KERALA
ഏറ്റുമാനൂര്‍, പൂഞ്ഞാര്‍ മണ്ഡലങ്ങളില്‍ എന്‍ഡിഎയ്ക്ക് രണ്ടു സ്ഥാനാര്‍ഥികള്‍: മുന്നണിയില്‍ ആശയക്കുഴപ്പം
ഏറ്റുമാനൂര്‍, പൂഞ്ഞാര്‍ മണ്ഡലങ്ങളില്‍ എന്‍ഡിഎയ്ക്ക് രണ്ടു സ്ഥാനാര്‍ഥികള്‍: മുന്നണിയില്‍ ആശയക്കുഴപ്പം
കോട്ടയം: പത്രിക സമര്‍പ്പിക്കാനുള്ള സമയം അവസാനിച്ചതോടെ ഏറ്റുമാനൂര്‍, പൂഞ്ഞാര്‍ മണ്ഡലങ്ങളില്‍ എന്‍ഡിഎയ്ക്ക് രണ്ടു സ്ഥാനാര്‍ഥികള്‍. ബിജെപി, ബിഡിജെഎസ് സ്ഥാനാര്‍ഥികള്‍ പത്രിക സമര്‍പ്പിച്ചതാണ് മുന്നണിയില്‍ ആശയക്കുഴപ്പം സൃഷ്ടിച്ചിരിക്കുന്നത്
ഏറ്റുമാനൂരില്‍ ബിജെപിക്കായി എന്‍.ഹരികുമാറും ബിഡിജെഎസിനായി എന്‍.ശ്രീനിവാസനും മത്സര രംഗത്തുണ്ട്. പൂഞ്ഞാറിലും സ്ഥിതി ഇതുതന്നെയാണ്. ഇവിടെയും ബിജെപി, ബിഡിജെഎസ് സ്ഥാനാര്‍ഥികള്‍ പത്രിക സമര്‍പ്പിച്ചു.
എന്‍ഡിഎയിലെ തര്‍ക്കമാണ് മുന്നണിക്കായി രണ്ടു സ്ഥാനാര്‍ഥികള്‍ രംഗത്തുവരാന്‍ കാരണം. മുന്നണിയിലെ ധാരണപ്രകാരം ഏറ്റുമാനൂര്‍, പൂഞ്ഞാര്‍ സീറ്റുകള്‍ ബിഡിജെഎസിനാണ്. എന്നാല്‍ ഇരു മണ്ഡലങ്ങളിലും ബിഡിജെഎസ് നിയോഗിച്ചത് ദുര്‍ബല സ്ഥാനാര്‍ഥികളാണെന്ന വാദമുയര്‍ത്തിയാണ് ബിജെപി സ്വന്തം നിലയ്ക്ക് സ്ഥാനാര്‍ഥിയെ നിര്‍ത്തിയത്.
ഏറ്റുമാനൂരില്‍ ആദ്യം പ്രഖ്യാപിച്ച സ്ഥാനാര്‍ഥിയെ ബിജെപിയുടെ അനിഷ്ടത്തെ തുടര്‍ന്ന് ബിഡിജെഎസ് നേതൃത്വം മാറ്റിയിരുന്നു. എന്നാല്‍ രണ്ടാമത് പ്രഖ്യാപിച്ച സ്ഥാനാര്‍ഥിയെയും ബിജെപി അംഗീകരിക്കാന്‍ തയാറായില്ല.
പ്രാദേശിക തലത്തിലുള്ള തര്‍ക്കം മാത്രമാണിതെന്നും പത്രിക പിന്‍വലിക്കാനുള്ള സമയം അവസാനിക്കുമ്പോള്‍ ഏറ്റുമാനൂരില്‍ എന്‍ഡിഎയ്ക്ക് ഒറ്റ സ്ഥാനാര്‍ഥി മാത്രയേ കാണൂ എന്നാണ് ബിജെപി ജില്ലാ നേതൃത്വത്തിന്‍റെ വിശദീകരണം
