Gulf
ഗള്‍ഫിലെ ഏറ്റവും വലിയ ഹൈന്ദവ ക്ഷേത്രം.ഫെബ്രുവരി 14ന് നരേന്ദ്ര മോദി ഭക്തര്‍ക്കായി തുറന്നുകൊടുക്കും.
ദുബായ്: ഗള്‍ഫിലെ ഏറ്റവും വലിയ ഹൈന്ദവ ക്ഷേത്രം അടുത്ത വര്‍ഷം പ്രധാനമന്ത്രി നരേന്ദ്ര മോദി ഭക്തര്‍ക്കായി തുറന്നുകൊടുക്കും. പരമ്പരാഗത ഹിന്ദു ശിലാക്ഷേത്രത്തിന്റെ ഉദ്ഘാടനം 2024 ഫെബ്രുവരി 14ന്
നടക്കും.
അബുദാബി സന്ദര്‍ശനത്തിനെത്തിയ കേന്ദ്രമന്ത്രി ധര്‍മേന്ദ്ര പ്രധാന്‍ ക്ഷേത്രത്തിന്റെ നിര്‍മ്മാണം വിലയിരുത്തി. സ്വാമി ബ്രഹ്മവിഹാരി ദാസ്, മന്ത്രിയെ നിര്‍മ്മാണ പുരോഗതിയെക്കുറിച്ച് വിശദീകരിച്ചു., ഇന്ത്യ-യുഎഇ സൗഹൃദത്തിന്റെ പ്രതീകമായി തുടരുന്ന ക്ഷേത്രത്തിന്റെ പൂര്‍ത്തീകരണത്തിനായി ആകാംക്ഷയോടെ കാത്തിരിക്കുകയാണ്. ക്ഷേത്രം യാഥാര്‍ത്ഥ്യമാക്കുന്നതില്‍ പിന്തുണച്ച യുഎഇ നേതാക്കള്‍ക്ക് പ്രധാന്‍ നന്ദി പറഞ്ഞു.
യുഎഇയില്‍ സമ്പന്നമായ ഇന്ത്യന്‍ സംസ്‌കാരവും പൈതൃകവും പ്രോത്സാഹിപ്പിക്കുന്നതിനും ഇരു രാജ്യങ്ങളും തമ്മിലുള്ള ശാശ്വതമായ ബന്ധം ശക്തിപ്പെടുത്തുന്നതിനും ക്ഷേത്രത്തിന്റെ പ്രാധാന്യവും അദ്ദേഹം ഊന്നിപ്പറഞ്ഞു. ക്ഷേത്രം പൂര്‍ത്തിയാകുമ്പോള്‍, അബുദാബിയുടെ ഹൃദയഭാഗത്ത് ഐക്യത്തിന്റെയും ആത്മീയതയുടെയും വിളക്കുമാടമായി നിലകൊള്ളും. രണ്ട് രാജ്യങ്ങളും തമ്മിലുള്ള ശക്തമായ ബന്ധവും മതപരവും സാംസ്‌കാരികവുമായ വൈവിധ്യങ്ങളോടുള്ള പ്രതിബദ്ധതയും ശക്തിപ്പെടുത്തും. പ്രധാന്‍ പറഞ്ഞു.
പൂര്‍ത്തിയാകുമ്പോള്‍, മിഡില്‍ ഈസ്റ്റിലെ ആദ്യത്തെ പരമ്പരാഗത ഹിന്ദു ശിലാ മന്ദിരമായിരിക്കും. 55,000 ചതുരശ്ര മീറ്റര്‍ സ്ഥലത്താണ് സ്ഥിതി ചെയ്യുന്നത്. സാമൂഹികവും സാംസ്‌കാരികവും ആത്മീയവുമായ പരമ്പരാഗത ഹിന്ദു ക്ഷേത്രത്തിന്റ എല്ലാ വശങ്ങളും സവിശേഷതകളും മന്ദിര്‍ ഉള്‍ക്കൊള്ളുന്നു. സന്ദര്‍ശക കേന്ദ്രം, പ്രാര്‍ത്ഥനാ ഹാളുകള്‍, പ്രദര്‍ശനങ്ങള്‍, പഠന മേഖലകള്‍, കുട്ടികള്‍ക്കുള്ള സ്‌പോര്‍ട്‌സ് ഏരിയ, തീമാറ്റിക് ഗാര്‍ഡനുകള്‍, വാട്ടര്‍ ഫീച്ചറുകള്‍, ഒരു ഫുഡ് കോര്‍ട്ട്, പുസ്തകങ്ങള്‍, ഗിഫ്റ്റ് ഷോപ്പ് എന്നിവയും ക്ഷേത്രത്തോടനുനുബന്ധിച്ച് ഉള്‍പ്പെടുന്നു
2015 ഓഗസ്റ്റിലാണ് ക്ഷേത്രത്തിനായി യുഎഇ ഭരണകൂടം സ്ഥലം അനുവദിച്ചത്. പ്രധാനമന്ത്രി നരേന്ദ്ര മോദിയുടെ യുഎഇ സന്ദര്‍ശന വേളയില്‍ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്റെ സമ്മാനമായാണ് സ്ഥലം ലഭിച്ചത്. 2018 ഫെബ്രുവരിയില്‍ നിര്‍മാണ പ്രവര്‍ത്തനങ്ങള്‍ തുടങ്ങി. മന്ദിരത്തിനുള്ള ശിലാപൂജ ഫെബ്രുവരി 11ന് നടന്നു. സഹിഷ്ണുതയുടെ വര്‍ഷത്തിന്റെ ഭാഗമായി യുഎഇ ഗവണ്‍മെന്റ് 2019 ജനുവരിയില്‍ ക്ഷേത്രത്തിന് 14 ഏക്കര്‍ ഭൂമി കൂടി അനുവദിച്ചു.
നിര്‍മ്മാണത്തിനായി ടണ്‍ കണക്കിന് പിങ്ക് മണല്‍ക്കല്ലുകള്‍ വടക്കന്‍ രാജസ്ഥാനില്‍ നിന്ന് അബുദാബിയിലേക്ക് എത്തിച്ചു. ചുട്ടുപൊള്ളുന്ന വേനല്‍ക്കാല താപനിലയെ ചെറുക്കാനുള്ള കഴിവ് കണക്കിലെടുത്താണ് ഉത്തരേന്ത്യന്‍ സംസ്ഥാനത്ത് നിന്നുള്ള ഈടുനില്‍ക്കുന്ന കല്ലുകള്‍ തിരഞ്ഞെടുത്തത്. സ്റ്റീല്‍ അല്ലെങ്കില്‍ ഇരുമ്പ് സാമഗ്രികള്‍ ഉപയോഗിക്കാതെയാണ് ക്ഷേത്ര അടിത്തറ നിര്‍മ്മിക്കുന്നത്, പരമ്പരാഗത ഹിന്ദു ക്ഷേത്ര വാസ്തുവിദ്യയിലൂടെയാണ് നിര്‍മ്മിക്കുന്നത്. ഉരുക്കിനുപകരം, കോണ്‍ക്രീറ്റിലെ ബലപ്പെടുത്തലായി ഫ്‌ലൈ ആഷ് ഉപയോഗിക്കും .പിങ്ക് ശിലയില്‍ നിര്‍മിച്ചിരിക്കുന്ന ക്ഷേത്രത്തിന് 1000 വര്‍ഷത്തെ ആയുസ്സാണു പറയുന്നത്.
