പ്രതിപക്ഷത്തിന്‍റെ വാദങ്ങളെല്ലാം മുഖ്യമന്ത്രി അംഗീകരിച്ചിരിക്കുന്നു എന്തുകൊണ്ട് ജെയ്ക്കിന്‍റെ പേര്  വെബ്സൈറ്റിൽനിന്ന് നീക്കം ചെയ്തു എന്ന് വിശദീകരിക്കണമെന്നും മാത്യു കുഴൽ നാടൻ

കൊച്ചി: മുഖ്യമന്ത്രിക്കെതിരായ അവകാശലംഘന നോട്ടീസ് തള്ളിയ സ്പീക്കറുടെ റൂളിംഗിനെ മാനിക്കുന്നുവെന്ന് മാത്യു കുഴല്‍നാടന്‍ എംഎല്‍എ . നോട്ടീസിന്‍റെ മറുപടിയിലൂടെ തന്‍റെ  മകളുടെ കമ്പനിയുടെ   മെന്‍ററായിരുന്നു ജയ്ക് ബാലകുമാർ എന്ന കാര്യം  മുഖ്യമന്ത്രി സമ്മതിച്ചിരിക്കുകയാണ്. അന്ന് പറഞ്ഞ കാര്യം മുഖ്യമന്ത്രി അംഗീകരിച്ചിരിക്കുന്നു .പറഞ്ഞതിൽ ഉറച്ചുനിൽക്കുന്നു. സ്പീക്കറുടെ റൂളിംഗ് അംഗീകരിക്കുന്നു. ഇനി പരാതിയുമായി മുന്നോട്ടു പോകുന്നില്ലെന്നും അദ്ദേഹം വ്യക്തമാക്കി. 

 ഈ വിഷയത്തിൽ പ്രതിപക്ഷത്തിന്‍റെ വാദങ്ങളെല്ലാം മുഖ്യമന്ത്രി അംഗീകരിച്ചിരിക്കുകയാണ്. കമ്പനിയുടെ മെന്‍റര്‍ എന്ന വിവരം  മുഖ്യമന്ത്രി അംഗീകരിച്ച സ്ഥിതിക്ക് എന്തുകൊണ്ട് ജെയ്ക്കിന്‍റെ പേര്  വെബ്സൈറ്റിൽനിന്ന് നീക്കം ചെയ്തു എന്ന് വിശദീകരിക്കണമെന്നും അദേഹം പറഞ്ഞു. ഈ വിവാദത്തിന് പിന്നാലെ പോകാൻ ഇനി ആഗ്രഹിക്കുന്നില്ലെന്നും അദേഹം കൂട്ടിച്ചേർത്തു

പൊതുസമൂഹത്തിന് മുന്നിൽ തെളിയിക്കണമെന്ന് ആഗ്രഹിച്ചത് തെളിയിക്കാൻ കഴിഞ്ഞു. ആരെയും വ്യക്തിപരമായി ആക്ഷേപിക്കണമെന്ന് ആഗ്രഹിച്ചിട്ടില്ല. എന്തുകൊണ്ട് വെബ്സൈറ്റിൽ നിന്ന് നീക്കം ചെയ്തു എന്നത് വിശദീകരിക്കണമെങ്കിൽ അവർക്ക് ആകാമെന്നും കുഴൽ നാടൻ  പറഞ്ഞു.