KERALA
സി.പി.എം സെമിനാറില്‍ പങ്കെടുക്കാന്‍ കെ.വി. തോമസിന് കോണ്‍ഗ്രസ് നേതൃത്വത്തിന്റെ അനുമതിയില്ല
ന്യൂഡല്‍ഹി: സി.പി.എം സെമിനാറില്‍ പങ്കെടുക്കാന്‍ കെ.വി. തോമസിന് കോണ്‍ഗ്രസ് നേതൃത്വത്തിന്റെ അനുമതിയില്ല. സെമിനാറില്‍ പങ്കെടുക്കെണ്ടെതില്ലെന്ന കെ.പി.സി.സിയുടെ തീരുമാനത്തെ മറികടക്കാനുള്ള സാഹചര്യം ഇപ്പോള്‍ ഉണ്ടായിട്ടില്ലെന്ന് കോണ്‍ഗ്രസ് ഹൈക്കമാന്‍ഡ് വ്യക്തമാക്കി. നേരത്തെ കത്ത് കൊടുത്തപ്പോള്‍ തന്നെ ശശി തരൂരിനോടും കെ.വി. തോമസിനോടും ഹൈക്കമാന്‍ഡ് നിലപാട് വ്യക്തമാക്കിയിരുന്നതാണ്. കെ.പി.സി.സിയുടെ തീരുമാനം എന്താണോ അത് അനുസരിക്കണം എന്ന നിലപാടായിരുന്നു ഹൈക്കമാന്‍ഡ് അന്ന് സ്വീകരിച്ചിരുന്നത്.
സംസ്ഥാന നേതൃത്വത്തെ തള്ളി സിപിഎം പാര്‍ട്ടി കോണ്‍ഗ്രസില്‍ പങ്കെടുക്കാന്‍ ചരടുവലിയുമായി കെ.വി. തോമസ് രംഗത്തെത്തിയിരുന്നു. സി.പി.എം സെമിനാറില്‍ പങ്കെടുക്കാന്‍ കോണ്‍ഗ്രസ് അധ്യക്ഷ സോണിയ ഗാന്ധിയുടെ അനുമതി ചോദിച്ച് അദ്ദേഹം കത്തയച്ചിരുന്നു. ഒന്‍പതാം തീയതി വരെ സമയമുണ്ടെന്നും കാത്തിരുന്ന് കാണാമെന്നും അദ്ദേഹം പറഞ്ഞിരുന്നു.
ഡല്‍ഹിയിലെ രാഷ്ട്രീയ ജീവിതത്തില്‍, എല്ലാവരേയും യോജിപ്പിച്ചുകൊണ്ടാണ് കോണ്‍ഗ്രസ് ഗവണ്‍മെന്റ് മുന്നോട്ട് പോയത്. ഭക്ഷ്യസുരക്ഷാ നിയമം ഐക്യകണ്‌ഠേന പാസാക്കിയത് അങ്ങനെയാണ്. ഈയൊരു സാഹചര്യത്തിലാണ് ക്ഷണം ലഭിച്ചപ്പോള്‍ സോണിയ ഗാന്ധിക്ക് കത്തയച്ചത്. കെ.സി. വേണുഗോപാല്‍ വിളിച്ച് തന്നോട് ചില കാര്യങ്ങള്‍ പറഞ്ഞിട്ടുണ്ടെന്നും അദ്ദേഹം പറഞ്ഞിരുന്നു.
