Crime
എസ്ബിഐ തിരഞ്ഞെടുപ്പ് കമ്മീഷന് കൈമാറിയ ബോണ്ട് വിവരങ്ങള് പോരെന്ന് സുപ്രീംകോടതി.
ന്യൂഡല്ഹി: എസ്ബിഐ തിരഞ്ഞെടുപ്പ് കമ്മീഷന് കൈമാറിയ ബോണ്ട് വിവരങ്ങള് പോരെന്ന് സുപ്രീംകോടതി. എന്തുകൊണ്ട് എല്ലാ രേഖകളും കൈമാറുന്നില്ലെന്ന് ചോദിച്ച കോടതി ബോണ്ട് നമ്പറുകള് കൈമാറാത്തതില് എസ്ബിഐക്ക് നോട്ടീസ് അയക്കുകയും ചെയ്തു നമ്പറുകള് വെളിപ്പെടുത്തിയാല് ബോണ്ട് വാങ്ങിയവര് ആര്ക്കാണ് നല്കിയതെന്ന് വ്യക്തമാകും.
എസ്ബിഐ കൈമാറിയ വിവരങ്ങള് കഴിഞ്ഞ ദിവസം തിരഞ്ഞെടുപ്പ് കമ്മീഷന് പ്രസിദ്ധീകരിച്ചിരുന്നു.
തിരഞ്ഞെടുപ്പ് ബോണ്ട് നമ്പര് കൈമാറാത്തത് എന്ത് കൊണ്ടാണെന്ന് തിങ്കളാഴ്ചക്കകം അറിയിക്കാന് സുപ്രീം കോടതി നിര്ദേശിച്ചിട്ടുണ്ട്. കേസ് തിങ്കളാഴ്ച്ച വീണ്ടും പരിഗണിക്കുമെന്ന് ചീഫ് ജസ്റ്റിസ് ഡി.വൈ ചന്ദ്രചൂഡ് അധ്യക്ഷനായ ബെഞ്ച് അറിയിച്ചു.
തിരഞ്ഞെടുപ്പ് ബോണ്ടുമായി ബന്ധപ്പെട്ട എല്ലാ രേഖകളും തെരെഞ്ഞെടുപ്പ് കമ്മീഷന് കൈമാറാനായിരുന്നു തങ്ങളുടെ ഉത്തരവെന്ന് ബെഞ്ച് ചൂണ്ടിക്കാട്ടി. എന്നാല് തിരഞ്ഞെടുപ്പ് ബോണ്ട് നമ്പര് എസ്ബിഐ കമ്മീഷന് കൈമാറിയിട്ടില്ലെന്ന് ഹര്ജിക്കാര്ക്ക് വേണ്ടി ഹാജരായ സീനിയര് അഭിഭാഷകന് കപില് സിബലും, അഭിഭാഷകന് പ്രശാന്ത് ഭൂഷണും ചൂണ്ടിക്കാട്ടി.
തുടര്ന്ന് എസ്ബിഐക്ക് ഇതു സംബന്ധിച്ച നിര്ദേശം നല്കാന് ഭരണഘടന ബെഞ്ച് ഒരുങ്ങിയെങ്കിലും, ബാങ്കിന്റെ വാദം കേള്ക്കണമെന്ന് സോളിസിസ്റ്റര് ജനറല് കോടതിയില് ആവശ്യപ്പെടുകയായിരുന്നു. ഇതേ തുടര്ന്നാണ് കോടതി ബാങ്കിന് നോട്ടീസ് അയച്ചത്.
