KERALA
കൊല്ലത്ത് ദേശീയ പാതയിൽ നിര്‍മാണത്തിലിരുന്ന പാലം തകര്‍ന്നുവീണുമൂന്നാംതവണയാണ് പാലം നിര്‍മാണത്തിനിടെ പൊളിഞ്ഞുവീഴുന്നത്
കൊല്ലം: അയത്തില്‍ ജങ്ഷന് സമീപം നിര്‍മാണത്തിലിരുന്ന പാലം തകര്‍ന്നുവീണു. ദേശീയപാത വികസനവുമായി ബന്ധപ്പെട്ട് കൊല്ലം ബൈപ്പാസിലെ ചൂരാങ്കുല്‍ പാലത്തിനോട് ചേര്‍ന്ന് നിര്‍മിക്കുന്ന പുതിയ പാലമാണ് വ്യാഴാഴ്ച പൊളിഞ്ഞുവീണത്. അപകടത്തില്‍ ആര്‍ക്കും പരിക്കില്ല.
കോണ്‍ക്രീറ്റ് പ്രവൃത്തി നടക്കുന്നതിനിടെ പാലത്തിന് താഴെ സ്ഥാപിച്ചിരുന്ന കമ്പികള്‍ വീഴുകയും പിന്നാലെ പാലം തകര്‍ന്നുവീഴുകയുമായിരുന്നെന്ന് പ്രദേശവാസികള്‍ പറയുന്നു. അപകടസമയത്ത് പാലത്തിന്റെ മുകള്‍ഭാഗത്ത് നാല് തൊഴിലാളികളുണ്ടായിരുന്നു. അപകടമുണ്ടായ ഉടന്‍ ഇവര്‍ ചാടിരക്ഷപ്പെട്ടു. ഇവര്‍ക്കാര്‍ക്കും പരിക്കില്ല.
അതേസമയം, നിര്‍മാണത്തിലെ അപാകതയാണ് പാലം തകരാന്‍ കാരണമായതെന്ന് വാര്‍ഡ് മെമ്പര്‍ അനീഷ് ആരോപിച്ചു. ഇത് മൂന്നാംതവണയാണ് പാലം നിര്‍മാണത്തിനിടെ പൊളിഞ്ഞുവീഴുന്നതെന്നും വ്യാഴാഴ്ച രാവിലെ കോണ്‍ക്രീറ്റ് നടക്കുന്നതിനിടെയാണ് അപകടം സംഭവിച്ചതെന്നും വാര്‍ഡ് മെമ്പര്‍ പറഞ്ഞു.
