എറണാകുളം – ബെംഗളൂരു വന്ദേ ഭാരത് ഷെഡ്യൂൾ പുറത്തുവിട്ട് റെയിൽവേ.

കൊച്ചി: കാത്തിരിപ്പിനൊടുവിൽ എറണാകുളം – ബെംഗളൂരു വന്ദേ ഭാരത് ഷെഡ്യൂൾ പുറത്തുവിട്ട് റെയിൽവേ. കെഎസ്ആർ ബെംഗളൂരു സ്റ്റേഷനിൽ നിന്ന് എറണാകുളത്തേക്ക് സർവീസ് നടത്തുന്ന വന്ദേ ഭാരത് എക്സ്പ്രസ് ട്രെയിനിന് ആകെ ഏഴ് സ്റ്റോപ്പുകളാണ് ഉള്ളത്.

രാവിലെ 05:10ന് ബെംഗളൂരുവിൽ നിന്ന് പുറപ്പെടുന്ന ട്രെയിൻ ഉച്ചയ്‌ക്ക് 01:50ന് എറണാകുളത്തെത്തും. മടക്കയാത്ര 02:20ന് ആരംഭിച്ച് രാത്രി 11 മണിയ്‌ക്ക് ബെംഗളൂരുവിലെത്തുന്ന വിധത്തിലാണ് ഷെഡ്യൂൾ ക്രമീകരിച്ചിരിക്കുന്നത്. സ്റ്റോപ്പുകളും സമയക്രമവും വിശദമായി അറിയാം.

കേരളത്തിൽ രണ്ട് സ്റ്റോപ്പുകൾ മാത്രമാണ് ബെംഗളൂരു വന്ദേ ഭാരതിന് ഉള്ളത്. പാലക്കാടും തൃശൂരും. തുടർന്ന് കോയമ്പത്തൂർ വഴി വന്ദേ ഭാരത് ബെംഗളൂരുവിലേക്ക് പോകും. മറ്റ് വന്ദേ ഭാരതുകൾക്ക് സമാനമായി ആഴ്ചയിൽ ആറ് ദിവസമാണ് കേരളത്തിന്റെ മൂന്നാം വന്ദേ ഭാരതും സർവീസ് നടത്തുക.

ബെംഗളൂരൂ – എറണാകുളം വന്ദേ ഭാരത് ഷെഡ്യൂൾ

ട്രെയിൻ നമ്പർ 26651 കെഎസ്ആർ ബെംഗളൂരു – എറണാകുളം വന്ദേ ഭാരത് എക്സ്പ്രസ് രാവിലെ 05:10ന് ബെംഗളൂരുവിൽ നിന്ന് പുറപ്പെടും. തുടർന്ന് 05:23 കൃഷ്ണരാജപുരം, 08:13 സേലം, 09:00 ഈറോഡ്, 09:45തിരുപ്പൂർ, 10:33 കോയമ്പത്തൂർ, 11:28 പാലക്കാട്, 12:28 തൃശൂർ സ്റ്റേഷനുകൾ പിന്നിട്ടാണ് ഉച്ചയ്‌ക്ക് 01:50ന് എറണാകുളത്തെത്തുക.

എട്ട് മണിക്കൂർ 40 മിനിറ്റ് കൊണ്ടാണ് ബെംഗളൂരു വന്ദേ ഭാരത് യാത്ര പൂർത്തിയാക്കുക. നിലവിൽ ഈ റൂട്ടിൽ ഓടുന്ന എക്സ്പ്രസ് ട്രെയിനുകൾ 10 – 12 മണിക്കൂർ വരെ എടുക്കുന്ന യാത്രയാണ് പുതിയ വന്ദേ ഭാരത് ട്രെയിനിൽ 8.40 മണിക്കൂർ കൊണ്ട് പൂർത്തിയാക്കുക. ബെംഗളൂരുവിൽ ജോലി ചെയ്യുന്നവർക്കും വിദ്യാർഥികൾക്കും ഏറെ പ്രയോജനപ്പെടുന്ന സർവീസായി ഇത് മാറും.