Crime
കൊട്ടാരക്കരയില് അഭിഭാഷകന് വെടിയേറ്റു
കൊല്ലം: കൊട്ടാരക്കരയില് അഭിഭാഷകന് വെടിയേറ്റു. പുലമണ് സ്വദേശി മുകേഷി(34)നാണ് ഇന്നലെ രാത്രി 11 മണിയോടെ വെടിയേറ്റത്. അയല്ക്കാര് തമ്മിലുള്ള സംഘര്ഷത്തെ തുടര്ന്നാണ് സംഭവം. തോളെല്ലില് വെടിയേറ്റ അഭിഭാഷകന് തിരുവനന്തപുരം മെഡിക്കല് കോളേജില് ചികിത്സയിലാണ്.വെടിയുണ്ട പുറത്തെടുക്കാനുള്ള ശസ്ത്രക്രിയ ഇന്ന് നടക്കും. അയല്ക്കാരനും അഭിഭാഷകന്റെ കുടുംബവും തമ്മില് മുന്പും പ്രശ്നമുണ്ടായിരുന്നു. വീട് കയറി മുകേഷിന്റെ മാതാപിതാക്കളെ മര്ദ്ദിച്ച സംഭവവും ഉണ്ടായിരുന്നു. സംഭവവുമായ് ബന്ധപ്പെട്ട് അയൽവാസി പ്രൈം അലക്സിനെ അറസ്റ്റ് ചെയ്തു.
ഇയാള്ക്കൊപ്പം സംഭവസമയം മറ്റൊരാള് കൂടിയുണ്ടായിരുന്നുവെന്നാണ് പോലീസ് പറയുന്നത്. ഇയാളെയും പോലീസ് കസ്റ്റഡിയിലെടുത്തു. ചോദ്യം ചെയ്ത ശേഷം പ്രതിയാക്കുന്ന കാര്യത്തില് തീരുമാനമെടുക്കും. നിലവില് അറസ്റ്റ് രേഖപ്പെടുത്തിയ അയല്വാസിക്കെതിരെ വധശ്രമത്തിനാണ് കേസെടുത്തിരിക്കുന്നത്.
