തിരുവനന്തപുരത്ത് 17 കാരിയെ കഴുത്തറുത്ത് കൊലപ്പെടുത്തി സുഹൃത്ത് പിടിയിൽ

തിരുവനന്തപുരം: വർക്കലയിൽ പെൺകുട്ടിയെ കഴുത്തറുത്ത് കൊലപ്പെടുത്തി. വടശ്ശേരി സംഗീത നിവാസിൽ സംഗീതയാണ് (17) കൊല്ലപ്പെട്ടത്. രണ്ടാം വർഷം ഡിഗ്രി വിദ്യാർത്ഥിനിയാണ്. വീടിന് പുറത്ത് ചോരയിൽ കുളിച്ച നിലയിൽ ഇന്നലെ രാത്രി കണ്ടെത്തുകയായിരുന്നു.
സഹോദരിക്കൊപ്പം ഉറങ്ങിക്കിടക്കുകയായിരുന്നു സംഗീത. പിന്നീട് അർധരാത്രി വീട്ടിന് പുറത്ത് രക്തത്തിൽ കുളിച്ചുകിടക്കുന്ന നിലയിൽ കണ്ടെത്തുകയായിരുന്നു. തുടർന്ന് ബന്ധുക്കൾ ചേർന്ന് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.സംഭവത്തിൽ സംഗീതയുടെ ആൺ സുഹൃത്ത് പള്ളിയ്‌ക്കൽ സ്വദേശി ഗോപു പിടിയിലായി. സംഗീതയും ഗോപുവും അടുപ്പത്തിലായിരുന്നു. ഗോപു സംഗീതയിൽ വിശ്വാസം ഉറപ്പിക്കുന്നതിനായി മറ്റൊരു നമ്പറിൽ നിന്ന് അഖിൽ എന്ന പേരിൽ പെൺകുട്ടിയുമായി ചാറ്റ് ചെയ്യുകയും മറ്റും ചെയ്തിരുന്നതായി പൊലീസ് പറയുന്നു. ഇയാൾ ഇത്തരത്തിൽ സംഗീതയുമായി ബന്ധം തുടരുകയായിരുന്നു. ഇതിനിടെ ഇന്നലെ ‘അഖിൽ’ ആവശ്യപ്പെട്ടപ്രകാരം സഹോദരിയെ അറിയിച്ച് സംഗീത വീടിന് പുറത്തേയ്ക്ക് പോവുകയായിരുന്നു. യുവാവിനെ കണ്ടപ്പോൾ ഇത് ഗോപു തന്നെയെന്ന് സംഗീതയ്ക്ക് സംശയം തോന്നിയിരുന്നു. തുടർന്ന് ഇയാൾ കയ്യിൽ കരുതിയിരുന്ന കത്തി ഉപയോഗിച്ച് സംഗീതയെ ആക്രമിക്കുകയായിരുന്നു. ഗോപു ഇപ്പോൾ പൊലീസ് കസ്റ്റഡിയിലാണ്