Crime
അരിക്കൊമ്പൻ തമിഴ്നാട്ടിലും പണി തുടങ്ങി.വനം വകുപ്പിന്റെ വാഹനവും തകര്ത്തു.മേഘമലയില് നിരോധനാജ്ഞ പ്രഖ്യാപിച്ചു
മേഘമല : ചിന്നക്കനാലില്നിന്ന് നാടുകടത്തിയ അരിക്കൊമ്പൻ തമിഴ്നാടിന്റെ ഉറക്കവും കെടുത്തുന്നു. പെരിയാര് കടുവാ സങ്കേതത്തില് തുറന്നുവിട്ടശേഷം നടന്ന് മേഘമലയിലെത്തിയ അരിക്കൊമ്പന് അവിടെ കൃഷി ഉള്പ്പെടെ നശിപ്പിച്ചു. വനം വകുപ്പിന്റെ വാഹനവും തകര്ത്തു. ഇതോടെ മേഘമലയില് നിരോധനാജ്ഞ പ്രഖ്യാപിക്കുകയും വിനോദ സഞ്ചാരികള്ക്ക് നിയന്ത്രണമേര്പ്പെടുത്തുകയും ചെയ്തു.
കൃഷിയിടവും തമിഴ്നാട് വനം വകുപ്പിന്റെ വാഹനവും കഴിഞ്ഞ ദിവസം രാത്രി തകര്ത്തു. വാഴക്കൃഷി നശിപ്പിക്കാനാണ് ശ്രമിച്ചത്. ഇതോടെ വനപാലകര് ആനയെ തുരത്തിയോടിക്കാന് ശ്രമിച്ചു. ഇതോടെ വനംവകുപ്പിന്റെ വാഹനത്തിനു നേരെ തിരിയുകയും തകര്ക്കുകയുമായിരുന്നു. നിലവില് വനപാലകരും നാട്ടുകാരും ചേര്ന്ന് തമിഴ്നാട്ടിലെത്തന്നെ വനമേഖലയിലേക്ക് അരിക്കൊമ്പനെ ഓടിച്ചിരിക്കുകയാണ്.
പെരിയാര് കടുവാ സങ്കേതത്തിന്റെ ഡെപ്യൂട്ടി ഡയറക്ടര് ഉള്പ്പെടെയുള്ള ഉന്നത ഉദ്യോഗസ്ഥര് മേഘമലയിലെത്തും. തുടര്ന്ന് ആനെയ പെരിയാര് കടുവാ സങ്കേതത്തിലേക്കുതന്നെ തിരികെയെത്തിക്കാനായി ശ്രമം നടത്തുമെന്നാണ് അറിയുന്നത്.120 പേരടങ്ങുന്ന സംഘത്തെ തമിഴ്നാട് വനംവകുപ്പും അരിക്കൊമ്പനെ തുരത്താനായി നിയോഗിച്ചിട്ടുണ്ട്. പ്രദേശത്ത് ഇന്നു രാവിലെ എട്ടു മണി മുതൽനിരോധനാജ്ഞ പ്രഖ്യാപിച്ചു.
