KERALA
എം.എം മണിക്ക് മറുപടിയുമായ് സി.പി.ഐ ഒഴിപ്പിക്കാന് വരുന്നവരുടെ തലവെട്ടിക്കളഞ്ഞാല് മതിയല്ലോ! കാലും കയ്യും വെട്ടി നാവും പിഴുതെടുക്കുവാന് കൊറേ സമയം എടുക്കുമല്ലോ’
ഇടുക്കി: ഇടുക്കിയിലെ കയ്യേറ്റങ്ങള് ഒഴിപ്പിക്കാന് പ്രത്യേക ദൗത്യസംഘത്തെ നിയോഗിച്ചതില് എം.എം. മണിയടക്കമുള്ള സി.പി.എം. നേതാക്കളുടെ വിമർശനങ്ങൾക്ക് മറുപടിയുമായി സി.പി.ഐ. ഇടുക്കി ജില്ലാ സെക്രട്ടറി കെ.കെ. ശിവരാമന്. ജില്ലയിലെ കയ്യേറ്റ മാഫിയയെ തളയ്ക്കണം, കയ്യേറ്റക്കാരെ ഒഴിപ്പിക്കണമെന്ന് പറയുമ്പോള് ചിലര്ക്ക് സമനില തെറ്റുമെന്ന് അദ്ദേഹം പറഞ്ഞു. നിയമവിരുദ്ധമായി ദൗത്യസംഘം പെരുമാറിയാല് അവരെ തുരത്തുമെന്നായിരുന്നു എം.എം. മണിയുടെ പരാമര്ശം.
‘ഒഴിപ്പിക്കാന് വരുന്നവരുടെ കയ്യും വെട്ടും, കാലും വെട്ടും, നാവും പിഴുതെടുക്കും, എന്നൊക്കെയാണ് പ്രഖ്യാപനം. ഇത്രയും ബുദ്ധിമുട്ടുന്നത് എന്തിനാണ്? തലവെട്ടിക്കളഞ്ഞാല് മതിയല്ലോ! കാലും കയ്യും വെട്ടി നാവും പിഴുതെടുക്കുവാന് കൊറേ സമയം എടുക്കുമല്ലോ’, എന്നാണ് ശിവരാമൻ ഫെയ്സ്ബുക്ക് പോസ്റ്റില് ചൂണ്ടിക്കാട്ടിയത്.
‘ജില്ലയില് വിവിധ പഞ്ചായത്തുകളില് 1000 കണക്കിന് ഏക്കര് ഭൂമി കയ്യേറ്റ മാഫിയയുടെ കയ്യിലാണ്. ജില്ലയിലെ തോട്ടങ്ങള് തുണ്ട് തുണ്ടായി മുറിച്ചു വില്ക്കാന് തുടങ്ങിയിട്ട് കാലമേറെയായി. ഇതൊന്നും അധികാരികള് അറിയുന്നില്ല. അഥവാ അറിഞ്ഞാലും ഈ നിയമ വിരുദ്ധ പ്രവര്ത്തനത്തിന് തടയിടാന് കഴിയുന്നില്ല . 1000 കണക്കിന് ഭൂരഹിത കര്ഷക തൊഴിലാളികളും തോട്ടം തൊഴിലാളികളും ഒരു കൂര കെട്ടി താമസിക്കാന് ഇടമില്ലാത്ത നാട്ടിലാണ് കയ്യേറ്റക്കാരെ പറുദീസ ഒരുക്കുന്നതെന്നും ശിവരാമൻ പറഞ്ഞു.
