KERALA
മോദിക്ക് പിന്നാലെ, തൃശൂരിൽ നിന്നു തന്നെ മുന്നൊരുക്കങ്ങൾ ആരംഭിക്കാൻ കോൺഗ്രസും.മല്ലികാര്ജുന് ഖാര്ഗെ പങ്കെടുക്കുന്ന മഹാസമ്മേളനത്തോടെ തുടക്കമാവും
“
തിരുവനന്തപുരം: പ്രധാനമന്ത്രി നരേന്ദ്ര മോദിയെ തൃശൂരിലെത്തിച്ച് ബിജെപി തെരഞ്ഞെടുപ്പു പ്രവർത്തനങ്ങൾ ആരംഭിച്ചതിന് പിന്നാലെ, തൃശൂരിൽ നിന്നു തന്നെ മുന്നൊരുക്കങ്ങൾ ആരംഭിക്കാൻ കോൺഗ്രസും. കേരളത്തിലെ കോണ്ഗ്രസിന്റെ അവസാനഘട്ട മുന്നൊരുക്ക പ്രവര്ത്തനങ്ങള്ക്ക് ഫെബ്രുവരി 3ന് തൃശൂര് തേക്കിന്കാട് മൈതാനത്ത് എഐസിസി അധ്യക്ഷന് മല്ലികാര്ജുന് ഖാര്ഗെ പങ്കെടുക്കുന്ന മഹാസമ്മേളനത്തോടെ തുടക്കമാകും.
സംസ്ഥാനത്തെ 25,177 ബൂത്തുകളില് നിന്ന് ബൂത്ത് പ്രസിഡന്റ്, വനിതാ വൈസ് പ്രസിഡന്റ്, ബിഎല്എമാര് എന്നിങ്ങനെ മൂന്ന് പേരടങ്ങുന്ന 75,000ത്തില്പ്പരം പ്രവര്ത്തകരും മണ്ഡലം മുതല് എഐസിസി തലം വരെയുള്ള കേരളത്തില് നിന്നുള്ള ഭാരവാഹികളും ഉള്പ്പെടെ ഒരു ലക്ഷത്തോളം പേര് പങ്കെടുക്കും. ശനിയാഴ്ച്ച വൈകുന്നേരം 3.30ന് തേക്കിന്കാട് മൈതാനത്താണ് സമ്മേളനം. ഇതിനാവശ്യമായ വിപുലമായ മുന്നൊരുക്കങ്ങള് നടത്താന് കെപിസിസി പ്രസിഡന്റ് കെ. സുധാകരന് എംപിയുടെ അധ്യക്ഷതയില് ഓണ്ലൈനായി ചേര്ന്ന കെപിസിസി ഭാരവാഹി യോഗം തീരുമാനിച്ചു.
എഐസിസി അധ്യക്ഷന് മല്ലികാര്ജുന് ഖാര്ഗെ ബൂത്ത് പ്രസിഡന്മാരും വനിതാ വൈസ് പ്രസിഡന്റും ബിഎല്എമാരുമായി നേരിട്ട് സംവാദം നടത്തും എന്നതാണ് തൃശൂര് സമ്മേളനത്തിന്റെ പ്രത്യേകത. മുന് കോണ്ഗ്രസ് അധ്യക്ഷന് രാഹുല് ഗാന്ധിയുടെ ഭാരത് ജോഡോ ന്യായ് യാത്ര കടന്നുപോകാത്ത സംസ്ഥാനങ്ങളില് എഐസിസി അധ്യക്ഷന് മല്ലികാര്ജുന് ഖാര്ഗെ നടത്തുന്ന പര്യടനത്തിന്റെ ഭാഗമായാണ് കേരളത്തിലും ബൂത്ത് തലം വരെയുള്ള ഭാരവാഹികളുമായി സംവദിക്കുന്ന മഹാസമ്മേളനം വിളിച്ചുചേര്ക്കുന്നത്.
കെപിസിസി പ്രസിഡന്റിന്റെ അധ്യക്ഷതയില് നടക്കുന്ന സമ്മേളനത്തില് എഐസിസി ജനറല് സെക്രട്ടറി ദീപ ദാസ് മുന്ഷി, പ്രതിപക്ഷ നേതാവ് വി.ഡി. സതീശന് , കോണ്ഗ്രസ് പ്രവര്ത്തക സമിതി അംഗങ്ങളായ രമേശ് ചെന്നിത്തല, ഡോ. ശശി തരൂര് എംപി, കൊടിക്കുന്നില് സുരേഷ് എംപി, യുഡിഎഫ് കണ്വീനര് എം.എം. ഹസന്, കെപിസിസി പ്രചാരണ സമിതി ചെയര്മാന് കെ. മുരളീധരന് എംപി, എഐസിസി ഭാരവാഹികള്, കെപിസിസി രാഷ്ട്രീയകാര്യ സമിതി അംഗങ്ങള്, കെപിസിസി ഭാരവാഹികള്, ഡിസിസി പ്രസിഡന്റുമാര്, എംപിമാര്, എംഎല്എമാര്, ഡിസിസി, ബ്ലോക്ക്- മണ്ഡലം ഭാരവാഹികള്, പോഷക സംഘടനകളുടെയും സെല്ലുകളുടേയും ഭാരവാഹികള് ഉള്പ്പെടെയുള്ളവര് പങ്കെടുക്കും.
