കോൺഗ്രസിൽ രണ്ട് ഗ്രൂപ്പുകൾ ഉണ്ടായിരുന്നത് പുതിയ വിവാദത്തോടെ അഞ്ച് ഗ്രൂപ്പുകളായി ഉയ‌ർന്നതായി വിജയരാഘവൻ

തിരുവനന്തപുരം: ദേശീയതലത്തിൽ പോലും തകർന്നു കൊണ്ടിരിക്കുന്ന കോൺഗ്രസിന്റെ തകർച്ചയുടെ വേഗം കൂട്ടാൻ പുതിയ ഡി സി സി വിവാദം കാരണമാകുമെന്ന് സി പി എം ആക്ടിംഗ് സെക്രട്ടറി എ വിജയരാഘവൻ. നേരത്തെ കോൺഗ്രസിൽ രണ്ട് ഗ്രൂപ്പുകൾ ഉണ്ടായിരുന്നത് പുതിയ വിവാദത്തോടെ അഞ്ച് ഗ്രൂപ്പുകളായി ഉയ‌ർന്നിട്ടുണ്ട്.
പാലക്കാട് കോൺഗ്രസിൽ നിന്നും രാജിവച്ച വിമത നേതാവ് എ വി ഗോപിനാഥ് താഴെത്തട്ടിൽ നിറഞ്ഞു നിന്ന് പ്രവ‌ർത്തിച്ചിട്ട‌ുള്ള നേതാവാണെന്ന് വിജയരാഘവൻ പറഞ്ഞു. നിലവിലെ കോൺഗ്രസിന്റെ അവസ്ഥയിൽ ആശങ്കയുള്ള ഒരു പ്രവർത്തകന്റെ സ്വരമാണ് ഗോപിനാഥിന്റേത്. ഗോപിനാഥ് സി പി എമ്മിൽ ചേർന്നേക്കുമെന്ന ഊഹാപോഹങ്ങൾക്കിടയിലാണ് മുൻ കോൺഗ്രസ് നേതാവിനെ പ്രശംസിച്ചു കൊണ്ടുള്ള സി പി എം സംസ്ഥാന സെക്രട്ടറിയുടെ വാക്കുകൾ.