Crime
എല്ദോസ് കുന്നപ്പിള്ളില് പൊലീസിന് മുന്നില് ഹാജരായി. ഇനി അറസ്റ്റ് രേഖപ്പെടുത്തും
തിരുവനന്തപുരം: പീഡന കേസില് പ്രതിയായ എല്ദോസ് കുന്നപ്പിള്ളില് എംഎല്എ പൊലീസിന് മുന്നില് ഹാജരായി. എല്ദോസിന് ജില്ലാ സെഷന്സ് കോടതി മുന്കൂര് ജാമ്യം അനുവദിച്ചുവെങ്കിലും അന്വേഷണ ഉദ്യോഗസ്ഥന് മുന്നില് കീഴടങ്ങണമെന്നായിരുന്നു കോടതി ഉത്തരവ്. ഇന്ന് രാവിലെ ഒന്പത് മണിക്ക് ജില്ലാ ക്രൈം ബ്രാഞ്ച് ഓഫീസില് ഹാജരായി. ഇനി എല്ദോസിന്റെ അറസ്റ്റ് രേഖപ്പെടുത്തിയ ശേഷം വൈദ്യപരിശോധനയും തെളിവെടുപ്പും നടത്തും.
പത്തു ദിവസം അന്വേഷണ ഉദ്യോഗസ്ഥന് ആവശ്യപ്പെട്ടാല് ഹാജരാകാനാണ് കോടതി നിര്ദ്ദേശിച്ചിട്ടുള്ളത്. ബലാത്സംഗ കേസില് ജാമ്യം ലഭിച്ചതിന് പിന്നാലെ പരാതിക്കാരിയെ നവമാധ്യമങ്ങള് വഴി ആക്ഷേപിച്ചുവെന്ന പരാതിയില് മറ്റൊരു കേസ് കൂടി പൊലീസ് എല്ദോസിനെതിരെ എടുത്തിരുന്നു. പേട്ട പൊലീസാണ് കേസെടുത്തത്. കേസില് പ്രതിയായതിനെ തുടര്ന്ന് ഒളിവിലായിരുന്ന എല്ദോസ് ജാമ്യം ലഭിച്ചതിന് പിന്നാലെ ഇന്നലെ പെരുമ്പാരൂരിലെ വീട്ടിലെത്തിയിരുന്നു.
