Education
ഒന്നാം ക്ലാസ് പ്രവേശന പ്രായം അഞ്ച് വയസ് തന്നെയെന്ന് മന്ത്രി വി. ശിവന്കുട്ടി
ഒന്നാം ക്ലാസ് പ്രവേശന പ്രായം അഞ്ച് വയസ് തന്നെയെന്ന് മന്ത്രി വി. ശിവന്കുട്ടി
തിരുവനന്തപുരം: സംസ്ഥാനത്തെ സ്കൂളുകളിലെ ഒന്നാം ക്ലാസ് പ്രവേശന പ്രായം അഞ്ച് വയസിൽ മാറ്റമില്ലെന്ന് പൊതുവിദ്യാഭ്യാസ മന്ത്രി വി. ശിവന്കുട്ടി. കാലങ്ങളായി നാട്ടില് നിലനില്ക്കുന്ന രീതി അഞ്ചു വയസ്സില് കുട്ടികളെ ഒന്നാം ക്ലാസില് ചേര്ക്കുക എന്നതാണ്. സമൂഹത്തെ വിശ്വാസത്തിലെടുത്തും ബോധ്യപ്പെടുത്തിയും മാത്രമേ പ്രവേശന പ്രായം വര്ധിപ്പിക്കാന് കഴിയൂ. അതിനാല് അഞ്ചു വയസ്സില് കുട്ടികളെ ഒന്നാംക്ലാസില് ചേര്ക്കണമെന്ന് ആഗ്രഹിക്കുന്ന രക്ഷിതാക്കള്ക്ക് അടുത്ത അക്കാദമിക വര്ഷവും അതിനുള്ള അവസരം ഉണ്ടാക്കാനാണ് തീരുമാനമെന്നും മന്ത്രി അറിയിച്ചു.
കേരളത്തിന്റെ വിദ്യാഭ്യാസ മാതൃക രാജ്യത്തിനാകെ മാതൃകയാണ്. ഫെഡറല് സംവിധാനത്തില് പ്രവര്ത്തിക്കാനുള്ള എല്ലാ സൗകര്യങ്ങളും പ്രയോജനപ്പെടുത്തിയാണ് സ്കൂള് വിദ്യാഭ്യാസം കേരളം മുന്നോട്ട് കൊണ്ട് പോകുന്നത്. അതിന്റെ ഗുണവും ഉണ്ടായിട്ടുണ്ട്. കേരളത്തിലെ സ്കൂള് പ്രായത്തില് ഉള്ള മുഴുവന് കുട്ടികളും സ്കൂളില് എത്തുന്നു. പഠനത്തുടര്ച്ച ഉറപ്പാക്കി ഏതാണ്ട് എല്ലാവരും പന്ത്രണ്ടാം ക്ലാസ് വരെ എത്തുന്നു. കൊഴിഞ്ഞുപോക്ക് വളരെ കുറവാണെന്നും മന്ത്രി വ്യക്തമാക്കി.
