Gulf
സൗദിയിൽ പോയപ്പോള് ബാങ്കുവിളി കേട്ടില്ലെന്ന പരാമര്ശത്തില് തിരുത്തുമായി മന്ത്രി സജി ചെറിയാന്.
“
തിരുവനന്തപുരം: സൗദി അറേബ്യയില് പോയപ്പോള് ബാങ്കുവിളി കേട്ടില്ലെന്നും അത് അദ്ഭുതപ്പെടുത്തിയെന്നുമുള്ള പരാമര്ശത്തില് തിരുത്തുമായി സാംസ്കാരിക വകുപ്പ് മന്ത്രി സജി ചെറിയാന്. ബാങ്ക് വിളി കേട്ടില്ല എന്ന പരാമര്ശം തനിക്കു ലഭിച്ച തെറ്റായ വിവരത്തില്നിന്ന് സംഭവിച്ചതാണെന്ന് സജി ചെറിയാന് തിരുത്തി. തന്റെ ഉദ്ദേശ്യശുദ്ധിയെ മനസ്സിലാക്കാതെയാണ് വാര്ത്ത പ്രചരിപ്പിച്ചതെന്നും സജി ചെറിയാന് ഫെയ്സ്ബുക്കില് കുറിച്ചു.
ഫെയ്സ് ബുക്ക് പോസ്റ്റിന്റെ പൂര്ണരൂപം-
ഇന്നലെ ഞാന് നടത്തിയ പ്രസംഗത്തിലെ ചില ഭാഗങ്ങള് എന്റെ ഉദ്ദേശശുദ്ധിയെ മനസിലാക്കാതെയാണ് ചിലര് പ്രചരിപ്പിക്കുന്നത്. സൗദി അറേബ്യയില് സന്ദര്ശനം നടത്തിയ അവസരത്തില് മതാനുഷ്ഠാനങ്ങള്, പ്രഭാഷണങ്ങള് എന്നിവ നടത്തുന്നത് സംബന്ധിച്ചും അവിടെ പാലിക്കുന്ന മിതത്വത്തെ സംബന്ധിച്ചും മറ്റ് മതസ്ഥരോടും അന്യനാട്ടുകാരോടും അവര് കാണിക്കുന്ന സ്നേഹവും ബഹുമാനത്തെപ്പറ്റിയും സഹയാത്രികന് പറഞ്ഞതാണ് ഞാന് പരാമര്ശിച്ചത്. മതസൗഹാര്ദത്തിന്റെ മികച്ച മാതൃക എനിക്കവിടെ കാണാനായി. ഗള്ഫ് രാജ്യങ്ങളിലേക്ക് തൊഴിലിനായി പോയ മലയാളികള് കേരളത്തിന്റെ മുഖച്ഛായ മാറ്റുന്നതില് നിര്ണായക പങ്ക് വഹിച്ചതിനെ സംബന്ധിച്ചും ഞാന് പറഞ്ഞു. ബാങ്ക് വിളി കേട്ടില്ല എന്ന എന്റെ പരാമര്ശം എനിക്ക് ലഭിച്ച തെറ്റായ വിവരത്തില് നിന്നും സംഭവിച്ചതാണ്. മാന്യ സഹോദരങ്ങള് ഇതു മനസിലാക്കി തെറ്റിദ്ധാരണ മാറ്റണമെന്ന് അഭ്യര്ത്ഥിക്കുന്നു.”
