Crime
6 വയസുകാരിയെ തട്ടിക്കൊണ്ടു പോയത് ആസൂത്രിതം, ഒരു വര്‍ഷം മുമ്പ് പദ്ധതിയിട്ടു,പലതവണ ശ്രമിച്ചെങ്കിലും നടന്നില്ല.
കൊല്ലം : വളരെ ആസൂത്രിതമായാണ് ആറുവയസുകാരിയെ ചാത്തന്നൂര്‍ സ്വദേശി പത്മകുമാറും ഭാര്യ അനിതാ കുമാരിയും മകള്‍ അനുപമ പത്മനും ചേര്‍ന്ന് തട്ടിക്കൊണ്ടു പോയതെന്ന് എ ഡി ജി പി അജിത് കുമാര്‍.കോവിഡ് കാലത്തിന് ശേഷം പത്മകുമാറിന് വലിയ കടബാധ്യത ഉണ്ടായിരുന്നു. അഞ്ച് കോടിയില്‍ പരം രൂപയുടെ ബാധ്യതയാണുളളത്. ഇത്രയും ആസ്തി കുടുംബത്തിനുണ്ടെങ്കിലും പെട്ടെന്ന് തന്നെ പത്ത് ലക്ഷം രൂപ ആവശ്യമുണ്ടായിരുന്നു. ഇതാണ് കുട്ടിയെ തട്ടിക്കൊണ്ട് പോകാന്‍ പദ്ധതിയിടാന്‍ കാരണം.
ഒരു വര്‍ഷം മുമ്പ് തന്നെ കുട്ടിയെ തട്ടിക്കൊണ്ടു പോകാന്‍ പദ്ധതിയിട്ടിരുന്നു. ഇതിനായി കാറിന്റെ വ്യാജ നമ്പര്‍ ഒരു വര്‍ഷം മുമ്പ് തന്നെ തയാറാക്കി. ശ്രദ്ധിക്കപ്പെടാന്‍ സാധ്യതയില്ലാത്ത വീട്ടിലെ കുട്ടിയെ തട്ടിക്കൊണ്ടു പോകാനാണ് ശ്രമിച്ചത്. പലതവണ ശ്രമിച്ചെങ്കിലും നടന്നില്ല.
എന്നാല്‍ തട്ടിക്കൊണ്ടു പോകാന്‍ കഴിഞ്ഞ ദിവസം കുട്ടിയുടെ സഹോദരന്റെ കടുത്ത എതിര്‍പ്പിനെ അതിജീവിച്ചാണ് കാറില്‍ കടത്തി കൊണ്ടു പോയത്. പിന്നീട് കിഴക്കനേലയിലെത്തി കടയുടമയുടെ ഫോണില്‍ നിന്ന് കുട്ടിയുടെ അമ്മയുടെ ഫോണിലേക്ക് വിളിച്ച് മോചനദ്രവ്യം ആവശ്യപ്പെട്ടത് അനിതാകുമാരിയാണ്. പത്മകുമാറും ഒപ്പമുണ്ടായിരുന്നു.
പിന്നീട് മാധ്യമ ശ്രദ്ധയും പൊലീസും പിന്നാലെയുണ്ടെന്ന് മനസിലാക്കിയാണ് കുട്ടിയെ ഉപേക്ഷിക്കാന്‍ തീരുമാനിച്ചത്. അപ്പോഴും കുട്ടിയെ സുരക്ഷിതയാക്കാനാണ് ആശ്രാമം മൈതാനത്ത് എത്തിച്ചത്. അനിതാ കുമാരിയാണ് കുട്ടിയെ ഓട്ടോയില്‍ അവിടെ എത്തിച്ചത്. പത്മകുമാര്‍ പിന്നാലെ ഉണ്ടായിരുന്നു.
