കൊവിഡ് വ്യാപനം ഗണ്യമായി കൂടുന്നതായി ആരോഗ്യമന്ത്രി

തിരുവനന്തപുരം: സംസ്ഥാനത്ത് കഴിഞ്ഞ ഒരാഴ്‌ചയ്‌ക്കിടെ കൊവിഡ് വ്യാപനം ഗണ്യമായി കൂടുന്നതായി ആരോഗ്യമന്ത്രി വീണാ ജോർജ് പറഞ്ഞു. കൂടുതൽ വർദ്ധന ഒഴിവാക്കാൻ ഓരോരുത്തരും വ്യക്തിപരമായി ശ്രദ്ധിക്കണം. ഒരാഴ്‌ചയിൽ ഉണ്ടായത് രോഗികളിൽ 100 ശതമാനം വർദ്ധനയാണ്.
പുതുതായി രോഗം സ്ഥിരീകരിച്ചത് 20നും 40നുമിടയിൽ പ്രായമുള‌ളവർക്കാണ്. സംസ്ഥാനത്ത് ഡെൽറ്റാ, ഒമിക്രോൺ കേസുകളുണ്ട്. ഇതിൽ ഒമിക്രോണിന് മൂന്നിരട്ടി വ്യാപനശേഷിയുണ്ട്. രോഗം വർദ്ധിച്ചാൽ ആശുപത്രികളിൽ സൗകര്യങ്ങൾക്ക് സംസ്ഥാനത്ത് പരിമിതിയുണ്ട്. അതിനാൽ ശ്രദ്ധ പുലർത്തണമെന്നും മന്ത്രി പറഞ്ഞു.എല്ലാ ജില്ലകളിലും കൊവിഡ് വ്യാപനം കൂടുന്നുണ്ട്. കൂടുതൽ ആരോഗ്യപ്രവർത്തകർ രോഗബാധിതരാകുന്നുണ്ടെന്നും മന്ത്രി കൂട്ടിച്ചേർത്തു”