Crime
സ്വന്തം സുരക്ഷ വര്‍ധിപ്പിക്കുന്ന പിണറായി വിജയന്‍ ജനങ്ങളുടെ കാര്യത്തില്‍ കൂടി ശ്രദ്ധിക്കണമെന്ന് കെപിസിസി പ്രസിഡന്റ്
കണ്ണൂര്‍: സംസ്ഥാനത്ത് വര്‍ധിച്ചു വരുന്ന കൊലപാതക പരമ്പരയില്‍ മുഖ്യമന്ത്രിയെ വിമര്‍ശിച്ച് കെ സുധാകരന്‍ എംപി. സ്വന്തം സുരക്ഷ വര്‍ധിപ്പിക്കുന്ന പിണറായി വിജയന്‍ ജനങ്ങളുടെ കാര്യത്തില്‍ കൂടി ശ്രദ്ധിക്കണമെന്ന് കെപിസിസി പ്രസിഡന്റ് ആവശ്യപ്പെട്ടു. കേരളത്തില്‍ ആരും എപ്പോള്‍ വേണമെങ്കിലും കൊല്ലപ്പെടുന്ന സാഹചര്യമാണ്. സംസ്ഥാനത്ത് കൊലപാതകങ്ങളുടെ തുടര്‍ക്കഥയാണ് ഉണ്ടാകുന്നതെന്നും അദ്ദേഹം വിമര്‍ശിച്ചു.
പാലക്കാട് സംഭവം കേരള മനസാക്ഷിയെ ഞെട്ടിച്ചു. തുടരെയുള്ള സംഭവങ്ങള്‍ ക്രമസമാധാന തകര്‍ച്ചയെയാണ് കാണിക്കുന്നത്. ലഹരി മാഫിയുടെയും ഗുണ്ടാസംഘങ്ങളുടെയും തട്ടിപ്പ് സംഘങ്ങളുടെയും പറുദീസയായി കേരളം മാറി. ആഭ്യന്തര വകുപ്പ് നിര്‍ജീവമാണ്. അക്രമ സാധ്യത മുന്‍കൂട്ടി തിരിച്ചറിയാനോ തടയാനോ സംസ്ഥാന രഹസ്യാന്വേഷണ സംവിധാനത്തിന് കഴിയുന്നില്ല. ആഭ്യന്തര വകുപ്പ് നാഥനില്ലാ കളരിയായി മാറിയെന്നും അദ്ദേഹം പറഞ്ഞു
