Education
ചാന്സലര് സ്ഥാനത്തുനിന്നും ഗവര്ണറെ നീക്കാനുള്ള ഓര്ഡിനന്സ് രാജ്ഭവനിൽ എത്തി
തിരുവനന്തപുരം: സംസ്ഥാനത്തെ മുഴുവന് സര്വകലാശാലകളുടേയും ചാന്സലര് സ്ഥാനത്തുനിന്നും ഗവര്ണറെ നീക്കാനുള്ള ഓര്ഡിനന്സ് രാജ്ഭവനിലേക്ക് അയച്ചതായി മുഖ്യമന്ത്രിയുടെ ഓഫീസ് അറിയിച്ചു. ഓര്ഡിനന്സ് ലഭിച്ചതായി രാജ്ഭവന് സ്ഥിരീകരിച്ചു. ഓര്ഡിനന്സുമായി ബന്ധപ്പെട്ട് നിലനിന്നിരുന്ന അവ്യക്തതകള്ക്ക് ഇതോടെ ഉത്തരമായി. തന്നെ ബാധിക്കുന്നത് ആയതിനാല് ഓര്ഡിനന്സ് രാഷ്ട്രപതിക്ക് അയക്കുമെന്ന് നേരത്തെ തന്നെ ഗവര്ണര് വ്യക്തമാക്കിയിരുന്നു.
മന്ത്രിസഭ അംഗീകരിച്ച ഓര്ഡിനന്സ് രാജ്ഭവനിലേക്ക് എത്താന് വൈകുന്നത് സംശയങ്ങള്ക്ക് ഇടയാക്കിയിരുന്നു. ഓര്ഡിനന്സ് ഗവര്ണറുടെ അംഗീകാരത്തിന് അയച്ചാലും നിയമനിര്മ്മാണവുമായി പിന്നോട്ട് പോകില്ലെന്ന് സര്ക്കാര് വൃത്തങ്ങള് വ്യക്തമാക്കുന്നു. ഓര്ഡിനന്സ് ഗവര്ണറുടെ പരിഗണനയില് ഇരുന്നാലും നിയമസഭ വിളിച്ചുചേര്ത്ത് ബില് അവതരിപ്പിച്ച് പാസാക്കുന്നതിന് തടസ്സമില്ലെന്നാണ് സര്ക്കാരിന് ലഭിച്ചിരിക്കുന്ന നിയമോപദേശം. ഗവര്ണര് ഓര്ഡിനന്സില് ഒപ്പിട്ടാലും ഇല്ലെങ്കിലും നിയമനിര്മ്മാണവുമായി മുന്നോട്ട് പോകുമെന്നാണ് നിയമവകുപ്പ് അറിയിക്കുന്നത്.
