HEALTH
സെക്രട്ടറിയേറ്റില്‍ കോവിഡ് വ്യാപനം രൂക്ഷം. 50 ശതമാനം ജീവനക്കാരെ ഉപയോഗിച്ച് പ്രവൃത്തി ദിവസങ്ങള്‍ നടത്തണമെന്ന് ചീഫ് സെക്രട്ടറിക്ക് കത്ത്
തിരുവനന്തപുരം : സെക്രട്ടറിയേറ്റില്‍ കോവിഡ് വ്യാപനം ശക്തമായ സാഹചര്യത്തില്‍ 50 ശതമാനം ജീവനക്കാരെ ഉപയോഗിച്ച് പ്രവൃത്തി ദിവസങ്ങള്‍ നടത്തണമെന്ന ആവശ്യവുമായി സെക്രട്ടറിയേറ്റ് അസോസിയേഷന്‍. ജീവനക്കാരുടെ എണ്ണം കുറയ്ക്കണമെന്ന് ആവശ്യപ്പെട്ടു സംഘടന ചീഫ് സെക്രട്ടറിക്ക് കത്ത് നല്‍കി. കാന്റീന്‍ തിരഞ്ഞെടുപ്പിന് ശേഷമാണ് സെക്രട്ടറിയേറ്റില്‍ കോവിഡ് വ്യാപിച്ചതെന്നാണ് പ്രതിപക്ഷ സംഘടനയുടെ പ്രധാന ആരോപണം.
55 പേര്‍ക്കാണ് നിലവില്‍ രോഗം സ്ഥിരീകരിച്ചിരിക്കുന്നത്. പരിശോധനകള്‍ കൂട്ടണമെന്നും ആവശ്യം ഉയരുന്നുണ്ട്. സന്ദര്‍ശകര്‍ക്ക് കടുത്ത നിയന്ത്രണം ഏര്‍പ്പെടുത്തിയിട്ടും കൊറോണ പടരുന്നത് തടയാനാകുന്നില്ല.
സെക്രട്ടറിയേറ്റില്‍ പൊതുജനങ്ങളെയും മാദ്ധ്യമ പ്രവര്‍ത്തകരെയും അകറ്റി നിര്‍ത്തുന്നതിന്റെ ഭാഗമായി ഒരു മാസമായി മൂന്ന് ഗേറ്റുകളും അടച്ചിട്ടിരിക്കുകയാണ്. ഏതെങ്കിലും ഉദ്യോഗസ്ഥരുടെ ശുപാര്‍ശ ഉണ്ടെങ്കില്‍ മാത്രമെ സെക്രട്ടറിയേറ്റിനുള്ളില്‍ പ്രവേശിക്കാനാകൂ.
ഈ സാഹചര്യത്തിലാണ് സെക്രട്ടറിയേറ്റ് കാന്റീന്‍ നടത്തിപ്പിനായുള്ള ഭരണസമിതി തിരഞ്ഞെടുപ്പിന്, പ്രോട്ടോകോള്‍ പാലിക്കാതെ കൂട്ടമായി വോട്ട് ചെയ്യാന്‍ ജീവനക്കാര്‍ എത്തിയത്. ഇടത്-വലത്-ബി.ജെ.പി അനുകൂല സംഘടനകള്‍ തമ്മിലായിരുന്നു മത്സരം. 5500 പേര്‍ക്കായിരുന്നു വോട്ടവകാശം ഉണ്ടായിരുന്നത്.
ദര്‍ബാര്‍ ഹാളിലും സൗത്ത് കോണ്‍ഫറന്‍സ് ഹാളിലുമാണ് വോട്ടു ചെയ്യാനുള്ള സൗകര്യം ഒരുക്കിയിരുന്നത്. ഇവിടങ്ങളില്‍ ക്രമീകരിച്ചിരുന്ന 11 പോളിംഗ് സ്റ്റേഷനുകളിലും സാമൂഹിക അകലം പാലിക്കാതെയാണ് വോട്ടെടുപ്പ് നടത്തിയത്. വാര്‍ത്ത പുറത്തായതോടെ പൊതുഭരണവകുപ്പ് സെക്യൂരിറ്റി ജീവനക്കാരെ ഉപയോഗിച്ച് തിരക്ക് നിയന്ത്രിച്ചിരുന്നു.
