Crime
രാജ്യ വ്യാപകമായി പോപ്പുലര് ഫ്രണ്ട് ഓഫീസുകളിലും നേതാക്കളുടെ വീടുകളിലും എന്.ഐ.എ റെയ്ഡ്.
കൊച്ചി: രാജ്യ വ്യാപകമായി പോപ്പുലര് ഫ്രണ്ട് ഓഫീസുകളിലും നേതാക്കളുടെ വീടുകളിലും ദേശീയ അന്വേഷണ ഏജന്സി (എന്.ഐ.എ)യുടെ റെയ്ഡ്. ബുധനാഴ്ച അര്ധരാത്രിയോടെയാണ് എന്ഐഎ ഉദ്യോഗസ്ഥര് റെയ്ഡിനായി എത്തിയത്. പുലര്ച്ചെ വരെ റെയ്ഡ് തുടര്ന്നു. സിആര്പിഎഫ് സുരക്ഷയോടെ ആയിരുന്നു റെയ്ഡ്. പലസ്ഥലത്തും പോപ്പുലര് ഫ്രണ്ടിന്റെ പ്രാദേശിക നേതാക്കളും പ്രവര്ത്തകരും പ്രതിഷേധവുമായി രംഗത്തെത്തി. തിരുവനന്തപുരം, കൊല്ലം, പത്തനംതിട്ട, കോട്ടയം, തൃശ്ശൂര്, കണ്ണൂര് ജില്ലകളില് റെയ്ഡ് നടന്നു.
പത്തനംതിട്ട ജില്ലാ സെക്രട്ടറി സാദിഖ് അഹമ്മദിന്റെ കൊന്നമൂട്ടിലെ വീട്ടിലും അടൂര് പറക്കോട് പ്രവര്ത്തിക്കുന്ന ജില്ലാ കമ്മിറ്റി ഓഫീസിലുമാണ് റെയ്ഡ് നടന്നത്. കണ്ണൂര് താണയിലുള്ള ഓഫീസിലാണ് റെയ്ഡ് നടന്നത്. പോപ്പുലര് ഫ്രണ്ട് സംസ്ഥാന സമിതിയംഗം യഹിയ തങ്ങളെ തൃശ്ശൂരില്നിന്നാണ് എന്ഐഎ സംഘം കസ്റ്റഡിയിലെടുത്തത്. തൃശ്ശൂരില് പെരുമ്പിലാവ് സ്വദേശിയാണ് യഹിയ തങ്ങള്. പെരുമ്പിലാവിലെ വീട്ടില് നടത്തിയ റെയ്ഡിനുശേഷമാണ് യഹിയ തങ്ങളെ കസ്റ്റഡിയിലെടുത്തത്. കോട്ടയം ജില്ലയിലെ മുണ്ടക്കയത്തും, പെരുവന്താനത്തുമാണ് റെയ്ഡ് നടന്നത്. ജില്ലാ നേതാക്കളടക്കം മൂന്നു പേരെ കസ്റ്റഡിയിലെടുത്തു. ഇവരുടെ വീടുകളില്നിന്ന് മൊബൈല് ഫോണുകളും, ടാബും, ലാപ്ടേപ്പുകളും പിടിച്ചെടുത്തിട്ടുണ്ട്.
റെയ്ഡിനെതിരെ പോപ്പുലര് ഫ്രണ്ടിന്റെ ഔദ്യോഗിക ഫെയ്സ്ബുക്ക് പേജില് പ്രതികരണം വന്നിട്ടുണ്ട്. ഭരണകൂട ഭീകരതയാണ് നടക്കുന്നതെന്നാണ് സംഘടനയുടെ ആരോപണം. എതിര് ശബ്ദങ്ങളെ അന്വേഷണ ഏജന്സികളെ ഉപയോഗിച്ച് നിശബ്ദമാക്കാനുള്ള ഫാസിസ്റ്റ് ഭരണകൂടത്തിന്റെ നീക്കത്തെ ചെറുക്കണമെന്നും അവര് പറയുന്നു.
ഡല്ഹിയില് രജിസ്റ്റര് ചെയ്ത തീവ്രവാദ സ്വഭാവമുള്ള കേസിന്റെ അടിസ്ഥാനത്തിലാണ് രാജ്യ വ്യാപക റെയ്ഡെന്നാണ് വിവരം. 100പേരെ കസ്റ്റഡിയിലെടുത്തിട്ടുണ്ട്. സിആര്.പി.എഫ് സുരക്ഷയോടെയാണ് റെയ്ഡ് നടന്നത്. റെയ്ഡിന് മുന്നോടിയായി കഴിഞ്ഞ ദിവസങ്ങളില്തന്നെ സി.ആര്.പി.എഫ് സംഘം കൊച്ചിയില് എത്തിയിരുന്നു. സംസ്ഥാന പോലീസിനെപ്പോലും ഒഴിവാക്കി ആയിരുന്നു റെയ്ഡ്. വിവിധ സ്ഥലങ്ങളില്നിന്ന് അറസ്റ്റിലായവരെ കൊച്ചിയിലെ എന്ഐഎ ഓഫീസില് എത്തിച്ചിട്ടുണ്ട്. 15 പേരെ ലക്ഷ്യമാക്കിയാണ് റെയ്ഡ് നടത്തിയതെന്നാണ് വിവരം. കൊച്ചിയിലെ എന്ഐഎ ഓഫീസിനും സിആര്പിഎഫ് സുരക്ഷ ഏര്പ്പെടുത്തിയിട്ടുണ്ട്. സുപ്രധാന രേഖകൾ പിടിച്ചെടുത്തു
