Crime
രാഹുലിന് ആശ്വാസം : അറസ്റ്റ് തടഞ്ഞ് ഹൈക്കോടതി: കേസ് ഈ മാസം 15 ന് പരിഗണിക്കും
കൊച്ചി: രാഹുൽ മാങ്കുട്ടത്തിൽ എം.എൽ.എ ക്കെതിരെ ഉയർന്ന ലൈംഗിക പീഡനക്കേസിൽ അറസ്റ്റ് തടഞ്ഞ് ഹൈക്കോടതി. മുന്കൂര് ജാമ്യാപേക്ഷ പരിഗണിക്കുന്നതിനിടെയാണ് ഹൈക്കോടതി ഇടക്കാല ഉത്തരവ് നടപ്പിലാക്കിയത്. കേസ് മറ്റ് നടപടികൾക്കായ് ഈ മാസം 15 ന് പരിഗണിക്കും. അത് വരെ അറസ്റ്റ് നടപടി പാടില്ലെന്നാണ് കോടതി ഉത്തരവ്. പോലീസ് 10 ദിവസമായി രാഹുലിനെ തേടി പോകാത സ്ഥലമില്ലായിരുന്നു. ഇതിനിടെയാണ് പ്രൊസി കൂഷന് തിരിച്ചടി നൽകി ഹൈക്കോടതി ഉത്തരവ് വന്നത്.
തിരുവനന്തപുരം ജില്ലാ പ്രിന്സിപ്പല് സെഷന്സ് കോടതി മുൻകൂർ ജാമ്യ ഹർജി തള്ളിയതിന് പിന്നാലെയാണ് രാഹുൽ ഹൈക്കോടതിയെ സമീപിച്ചിരുന്നത്.
പരാതിക്കാരിയുടെ മൊഴി പ്രകാരം ബലാത്സംഗക്കുറ്റം നിലനില്ക്കില്ലെന്നും പരാതിനല്കിയത് ബന്ധപ്പെട്ട നിയമസംവിധാനത്തിനുമുന്നില് അല്ലെന്നും മുന്കൂര് ജാമ്യാപേക്ഷയില് പറഞ്ഞിരുന്നു. പ്രമുഖ ക്രിമിനല് അഭിഭാഷകനായ എസ്. രാജീവ് മുഖേനയാണ് ഹൈക്കോടതിയിൽ രാഹുല് ഹര്ജി നല്കിയിരിക്കുന്നത്.
പ്രധാനമായും രണ്ട് വാദങ്ങളാണ് മുന്കൂര് ജാമ്യാപേക്ഷയിലുള്ളത്. പരാതിക്കാരിയുടെ മൊഴി പരിശോധിച്ചാല് ബലാത്സംഗക്കുറ്റം നിലനില്ക്കില്ലെന്ന് ഹര്ജിയില് പറയുന്നു. മാത്രമല്ല, ബന്ധപ്പെട്ട നിയമസംവിധാനത്തിലല്ല, മുഖ്യമന്ത്രിക്കാണ് പരാതി നല്കിയത്. പരാതി നല്കുന്നതില് കാലതാമസമുണ്ടായിട്ടുണ്ട്. രണ്ടുപേരുടെയും (രാഹുലിന്റെയും പരാതിക്കാരിയായ യുവതിയുടെയും) വൈവാഹിക അവസ്ഥ എന്താണെന്ന് വ്യക്തമായിരുന്നെന്നും രാഹുല് മുന്കൂര് ജാമ്യഹര്ജിയില് ചൂണ്ടിക്കാണിക്കുന്നു.
മാത്രമല്ല, ഓഡിയോ ക്ലിപ് പുറത്തെത്തിയത് ഇരുവരും തമ്മിലുള്ള ബന്ധം വഷളാക്കിയെന്നും താനാണ് അത് സമൂഹമാധ്യമത്തില് പ്രചരിപ്പിച്ചതെന്ന് പരാതിക്കാരി തെറ്റിധരിച്ചെന്നും രാഹുല് മുന്കൂര് ജാമ്യാപേക്ഷയില് പറയുന്നു.
പരാതിക്കാരിയുമായുള്ള ആശയവിനിമയ രേഖകള് കൈമാറാന് തയ്യാറാണ്. പോലീസ് പിന്നാലെയുള്ളതിനാലാണ് ഇത് കൈമാറാന് കഴിയാത്തത്. ഇടക്കാല ജാമ്യം നല്കിയാല് അന്വേഷണത്തോട് സഹകരിക്കാമെന്നും കസ്റ്റഡിയില് ചോദ്യംചെയ്യേണ്ട ആവശ്യം ഈ കേസില് ഇല്ലെന്നും രാഹുലിന്റെ മുന്കൂര് ജാമ്യാപേക്ഷയിൽ ചൂണ്ടിക്കാട്ടിയിരുന്നു
