International
പരിക്കേറ്റ ആറ് നാവികരിൽ രണ്ട് പേരുടെ നില ഗുരുതരം: കാണാതായ നാല് നാവികർക്കായി തിരച്ചിൽ തുടരുന്നു
കോഴിക്കോട്: കേരള തീരത്ത് കടലിൽ തീപിടിച്ച കപ്പലിൽ നിന്ന് രക്ഷപ്പെടുത്തിയ 18 നാവികരെ മംഗളൂരുവിലെ സ്വകാര്യ ആശുപത്രിയിൽ എത്തിച്ചു .രക്ഷപ്പെട്ടവരിൽ ആറ് പേർക്ക് പരിക്കേറ്റിട്ടുണ്ട്. ഇതിൽ രണ്ട് പേരുടെ നില ഗുരുതരമാണ്. പുകശ്വസിച്ച് ആരോഗ്യനില വഷളായ രണ്ട് പേരുടെ ആരോഗ്യനില മെച്ചപ്പെട്ടിട്ടുണ്ട്. ഗുരുതരാവസ്ഥയിൽ ചികിത്സയിലുള്ള രണ്ട് പേർക്ക് 35 മുതൽ 40 ശതമാനം വരെ പൊള്ളലേറ്റതായാണ് ആശുപത്രി വൃത്തങ്ങൾ വ്യക്തമാക്കിയിരിക്കുന്നത്. ഇവരുടെ ശ്വാസനാളത്തിലാണ് പൊള്ളലേറ്റത്. മുഖത്തും കയ്യലും കാലിലും ഗുരുതമായി പൊള്ളലേറ്റിട്ടുണ്ട്. ചൂട് പുകശ്വസിച്ച് ഇവരുടെ മൂക്കിനകത്തും പൊള്ളലേറ്റിട്ടുണ്ട്.
രക്ഷപ്പെടുത്തിയ 18 പേരിൽ ആരോഗ്യനില തൃപ്തികരമായ 12 പേരെ ഹോട്ടലിലേയ്ക്ക് മാറ്റിയിട്ടുണ്ട്. ചൈനയില് നിന്ന് എട്ട് പേര്, തായ്വാനില് നിന്ന് നാല് പേര്, മ്യാൻമറിൽ നിന്ന് നാല് പേര്, ഇന്ഡോനേഷ്യയില് നിന്നുമുള്ള രണ്ട് പേരുൾപ്പെടെ 18 പേരെയാണ് കണ്ടെത്തിയത് .
കൊളംബോയില് നിന്ന് നവി മുംബൈയിലേക്ക് പോയ സിംഗപ്പൂര് കപ്പലാണ് ഇന്നലെ അറബിക്കടലില് അപകടത്തില്പ്പെട്ടത്.
നാവികസേനയുടെയും കോസ്റ്റ്ഗാര്ഡിന്റെയും നേതൃത്വത്തിലാണ് രക്ഷാദൗത്യം പുരോഗമിക്കുന്നത്. കപ്പലിലുള്ളത് നാല് തരം രാസവസ്തുക്കളെന്ന് അഴീക്കല് പോര്ട്ട് ഓഫീസര് ക്യപ്റ്റന് അരുണ്കുമാര് പറഞ്ഞു. കപ്പലില് നിന്ന് ഇരുപതോളം കണ്ടെയ്നറുകള് കടലിലേക്ക് പതിച്ചെന്നാണ് റിപ്പോര്ട്ട്.ഇതിനിടെ അപകടത്തിൽപ്പെട്ട കപ്പലിൽ നിന്ന് കാണാതായ നാല് നാവികരെ ഇതുവരെ കണ്ടെത്താനായിട്ടില്ല. ഇവരെ കണ്ടെത്താനുള്ള ശ്രമങ്ങൾ തുടരുകയാണ്.
അപകടത്തിൽപ്പെട്ട കപ്പലിലെ തീ കെടുത്താനുള്ള ശ്രമങ്ങൾ വിജയിച്ചിട്ടില്ല. കപ്പൽ കത്തിയമരുകയാണ്. കപ്പലിനുള്ളിലെ കണ്ടെയ്നറുകളിൽ തീപിടുത്തവും പൊട്ടിത്തെറിയും ഉണ്ടാക്കുന്ന വസ്തുക്കൾ ഉണ്ടെന്നത് തീകെടുത്താനുള്ള ശ്രമം ദുഷ്കരമാക്കുന്നുണ്ട്.
കേരളതീരത്ത് ആഘാതമില്ലെങ്കിലും ബേപ്പൂര്, കൊച്ചി, തൃശൂര് തീരങ്ങളില് മീന്പിടുത്തം വിലക്കുണ്ട്. കപ്പലിലെ കണ്ടെയ്നറുകളിലുള്ള വസ്തുക്കള് എന്തെന്ന് വെളിപ്പെടുത്തണമെന്ന് കപ്പല് ഉടമകള്ക്ക് ഡയറക്ടറേറ്റ് ജനറല് ഓഫ് ഷിപ്പിംഗ് നിര്ദ്ദേശം നല്കി. വസ്തുക്കളുടെ സ്വഭാവം എന്താണെന്ന് അറിയിക്കണം. അഗ്നി്നിശമന സംവിധാനങ്ങള് എത്തിക്കണം. ഓരോ രണ്ടു മണിക്കൂറിലും സാഹചര്യം അറിയിക്കണം – എന്നൊക്കെയാണ് നിര്ദേശം.
